Дилноза сўнгги пайтлар камнамо. Қўл телефони рақамини ўзгартирган Дилноза, биз билан бир иш бўйича боғланди. Фурсатдан фойдаланиб, уни машҳур қилишга катта ҳисса қўшган "Келгинди келин” фильмини давоми "Келгинди келин-2” комедик мелодраммаси суратга олинаётганлиги, фильмдаги имижи, янги ёш партнёри ва умуман шу фильм билан боғлиқ саволларга кўмиб ташладик. Суҳбат орасида Дилнозанинг ўғилчаси баланд овозда куйлаб, ора-орада ёнимизга келиб "Ойижон ким?” деб саволга тутиб ҳам турди...
— "Келгинди келин-2” фильмининг фотоларини кўриб, "Пушкарёва” ("Не родись красивой” сериали қахрамони) образи кўз олдимизга келди...
— Йўғ-э, сиз фақат шу кўринишдаги суратларни кўрган бўлсангиз керак, қаҳрамоним образи ундай эмас.
— Аввалги суҳбатларда ёш актёр партнёрлар ролидан унчалик қониқмаётганингиз хақида айтгандингиз. Янги партнёрингиз Дилниёз исмли ёш актёр билан ишлаш қандай кечди? Бош ролга тасдиқлангани бежиз эмасдир?
— Тўғри, сценарийни ўқиганимда мана шундай типаждаги янги йигит кўз олдимга келган эди. Хамиша сценарийларни ўқиган пайтим кўз олдимда актерлар бирма-бир гавдаланади. Ва кўпинча тўғри таққослаган бўламан. Дилниёзга келсак, менимча тўғри танлов бўлди, ижро махоратига келсак бу йигит жудаям ғайратли, ишга бўлган иштиёқи аъло даражада. Ўзига нисбатан талабчан, ишга чанқоқ, нафақат режиссер Рустам Саъдиевни балки атрофдагиларнинг ҳам маслахат ва танбехларини жон қулоғи билан тинглаб, тахлил қилиб жамоага киришиб кетишга харакат қилди. Менинг хам йўл йўриқларимни тинглаб ўз ишига маъсулияти ва хурматини ижобий намоён қила олди.. Илк ишида унча мунча одам довдираб қолади, дебют иш жуда қийин бўлади. Лекин Дилниёзга хамма ёрдам берди, Рустам ака шахсан майдончада у билан кўп ишлади. Олдиндан гапиришга қўрқаман, лекин ёмон эмас. Ҳаққоний бахони халқ берсин, у олий хакам.
— Дилниёз кастингда танлаб олиндими ёки танишлар орқали топилдими?
— Йўқ таниш билишчилик йўқ. Бу болани санъатига мен ўзим қойил қолдим. Ўзбекистон давлат санъат институтида мени лицейда ўқитган устоз бор, Муқимий театрида режиссер Баходир Назаров деган, шу кишини қўлида Дилниёз тахсил олар экан. Мен эшитиб хурсанд бўлдим, демак бўлажак профессионал актер. 4 курсга ўтибди, мусиқали театр актери бўлганидан кейин куйлашади-да! Драма актерлари куйламайди. Улар Муқимий театрида ишлашади, биз эса Миллий театрда. Дилниёз уч йигитдан ташкил топган "ЭлДиДо” деган гурухда куйлар экан. Уч йигит - Элмурод, Достон ва Дилниёз исмларининг бош ҳарфларидан гурух номи келиб чиққан экан. Шу гурух ижоди институтда шов-шувга сабаб бўлган. Нафақат ўзбек қўшиқлари балки бутун жахон классик асарларини хам хаттоки аслидан ўтказиб куйлашар экан. Институтда концерт дастурини тақдим этишганида Рустам ака Саъдиев ва Шухрат ака Аббосовлар кўриб назарга олишган ва кўпчилик, домлалар хам уларга тавсия қилишган экан. Уччала йигит хам фильмда иштирок этиб, уччаласи хам ўз ролига мос тушган. Менга четдан шундай тублдими, билмадим. Шунинг учун бу ерда хеч қандай таниш билиш аралашмаган деб бемалол айта оламан. Ишқ бошқа хавас бошқа деб адашиб санъат ва кинога қизиқиб эртага савдо билан шуғулланадиган болалар эмас. Бўлажак профессионал актерлар.
— Партнерингиз бўлган уч таниқли актер - Адиз, Улуғбек ва Фаррухга бугунги кунга келиб тавсифлар мавжуд. Яқиндагина Рустам ака билан сухбатда бири сал инжиқ, иккинчиси эркатой, аммо улар орасидаги энг маданиятлиси Адиз деган фикрни эшитдик. Дилниёз нимаси билан улар орасидан жой топаркин?
— Бу йигитга хали бир нарса дейиш эрта, чунки дебютант, энди бошлаяпти. Лекин бу йигит ўта ғайратли дея оламан.
— Хозир бирон нарса дейиш қийин бўлса уч партнерларингиз бошида бошқача бўлиб хозир ўзгаришганми?
— Одам омад қўнганида , машхурлик берилганида синалади. Юқоридаги уччала актер, хусусан мен хам бир неча босқичлардан ўтиб, оқ қорани ажратиб ўзгариб бораверамиз. Кимдир эл юрт ва хамкор ижодкорлар олдида қандайдир хусусият орттирди, қандайдир таърифларга эга бўлишди. Халқда хар биримизга берилган тушунча ва бахолар бор. Шунинг учун Дилниёзга бир нарса дейиш эрта, аввал ўзини кўрсатсин, махоратини намойиш қилсин, кейин шунга қараб билинади. Хаммамиз уни машхурликда кутилаётган нарсалар хақида гапирдик, ишқилиб одамгарчиликдан чиқмай, машхурликка учмасин деймиз.
— Давомий фильмда, яна "Келгинди келин-2” фильмида иштирок этишга чўчимадингизми?
— (ўйланиб) Тўғри фильм ўша пайтда анча машхур бўлди. Чунки қаерга борсам "Шампунь кондиционер билан сигирингиз...” деган жойини хамма ёддан айтиб беради. Демак, одамларимиз кўрган ва кўряпти. Янги фильмни эса, унинг мантиқий давоми деб хам бўлмайди.. Лекин фильмни ғояси, сюжети ўша "Келгинди келин-2” деган номга лойиқ. Фақат, аввалги фильмнинг давомини "Келгинди келин-2” да кўришмайди, умуман бошқа ғоя, бошқа тақдирлар, тугун ва ечимлар...
— Кубаева бугунги кунда яна нималар билан банд?
—Эх-ей, театрда жавлон уряпмиз! Сахнада замон қахрамони тимсолини акс эттирувчи кетма-кет премьералар намойиш этдик. Мамлакатимиз мустақиллигининг 20 йиллиги олдидан вилоятларда гастрол сафарларида бўлдик. Энг яхши, замонавий, маънавий озуқа берадиган ва тарбиявий ахамиятга эга спектаклларимизни вилоят театрлари ва маданият саройларига бориб намойиш қилиб халқ билан мулоқотда бўлдик.
— Ўғилча қалай?
— Э, тўполончи бу, хар куни ишга олиб кет дейди. Уйдан чиқар бўлсам "Ойижон қаерга?”, телефонда гаплашсам "Ойижон ким?” деяверади. Катта бўлган сари хўжайинлик қиляпти (кулади). Ясан –тусан қилсам "Ойижон чиройлик” дейди (кулади). Борига шукр.
— Сиз билан илк сухбатда шахсий ҳаётингизга оид савол берганимда тинчлик, дея жавоб қайтарган эдингиз, интервьюдан кейин бир хафта ўтар-ўтмас тўйингиз хақида эшитгандим. Шундан кейин ҳар сухбат якунида шу саволни бериш мен учун анъанага айланди: "Ишқилиб бир хафталардан кейин табрикламаймизми?”
