«ЭЛЬ-КЛАССИКО»ДА КИМГА МУХЛИСЛИК ҚИЛАСИЗ?
Бугун кечқурун тунги соат 2.00да Испания чемпионатининг 16-тур доирасида Реал» ўз майдонида «Барселона»ни қабул қилади, яъни навбатдаги «Эл-классико» баҳси ўтказилади. Шу куни сайёрамиздаги миллионлаб футбол мухлисларининг нигоҳлари Мадриддаги «Сантьяго Бернабеу» ўйингоҳига қаратилади. Албатта мамлакатимиздаги мураббий ва футболчилар ҳам ушбу учрашувни ўзгача интиқлик билан кутишяпти. Биз улардан айримларига қу-йидаги икки савол билан мурожаат қилдик.
1. 11 декабрь кунги «Эль-классико» баҳсида қайси клубга мухлислик қиласиз ва башоратингизга кўра, ҳисоб қандай кўриниш олади?
2. Ушбу фикрингизга изоҳ бериб ўтинг ва сизнингча, голларни қайси футболчилар уришади?
Анвар Жабборов («Бунёдкор» мураббийи):
1. Кўп йиллар, аниқроғи, 20 йилдан буён «Реал»га мухлислик қиламан. Менимча, бу сафарги учрашувда 2:1 ҳисобида мадридликлар ғалаба қозонишади.
2. Бундай башорат қилишимнинг сабаби, биринчидан, мадридликлар айни пайтда яхши формадалар. Иккинчидан, «Реал» устози Жозе Моуриньо бу сафарга баҳсда майдонга оптимал таркибни туширса керак. Шунингдек, бундай ўйинларда ҳаммаси руҳиятга боғлиқ. Моуриньо шогирдлари эса айни пайтда турнир жадвалида азалий рақибларидан олдинда боришмоқда ва юксалиш давридалар. Шу омиллар ҳам мезбонлар фойдасига ўйнаса керак.
Мезбонлардан голларни Криштиану Роналдо ва Карим Бензема, каталонияликлардан эса Лионель Месси ёки Давид Вильялар уришлари мумкин.
Марат Мифтахутдинов (Ўзбекистон олимпия терма жамоаси катта мураббийи):
1. Иккала жамоага ҳам ишқибозлик қилмайман. Фақатгина чиройли ва ҳужумкор футбол тарафдориман. Фикримча, учрашув дуранг - 1:1 ҳисобида якунланади.
2. Чунки «Реал»нинг ўйинларида олдингига қараганда савия ошган. «Барселона» эса кутилмаганда «Хетафе»га ютқазиб қўйиб (0:1), кейинги турда «Леванте»дан «аламини олди» - 5:0. Ўйлайманки, Хосеп Гвардиола шогирдлари энди жиддий хатога йўл қўйишмайди ва Мадриддаги ўйинда қўлларидан келганича ижобий натижани қайд этишга ҳаракат қилишади.
Тўпларни эса менимча, майдон эгаларидан Гонсало Игуаин, каталонияликлардан эса Давид Вильялар киритишади.
Жамшид Саидов («Бухоро» бош мураббийи):
1. «Барселона» ишқибозиман. Менимча, 11 декабрь кунги баҳсда 2:1 ҳисобида каталонияликлар зафар қучишади.
2. Гарчи учрашув ҳужумкор руҳда, қизиқарли ва томошабоп тарзда ўтса-да, бу ўйинда менимча, йирик ҳисоб қайд этилмайди. Чунки жамоалар ҳимояга ҳам кўпроқ эътибор қаратишади.
Нўъмон Ҳасанов («Пахтакор» футбол академияси мураббийи):
1. Гарчи «Барселона»га мухлислик қилсам-да, 11 декабрь кунги баҳсда «Реал» 2:1 ҳисобида ғалаба қозонади, деб ўйлайман.
2. Бунга эса айни пайтда «Реал» футболчиларининг кайфиятлари кўтаринки эканлиги, жамоанинг ўтган йилги таркиби сақланиб қолганлиги ва улар бир-бирларини анча яхши тушуниб қолишганини сабаб қилиб кўрсатиш мумкин. «Барселона» эса кутилмаганда «Хетафе»га ютқазиб қўйди (0:1) ва уларда тушкун кайфият ҳукмрон. Бу нарса эса каталонияликларга салбий таъсир кўрсатади.
Менимча, мадридликлардан Роналду тўп киритса керак. Меҳмонлардан эса Месси гол уриши, буни амалга оширолмаган тақдирда эса шерикларига шундай имконият яратиб бериши мумкин.
Темур Кападзе («Инчхон Юнайтед» ярим ҳимоячиси):
1. «Реал»га ишқибозлик қиламан. Менимча, учрашувда дуранг - 2:2 ҳисоби қайд этилади.
2. Ушбу башоратимни изоҳлайдиган бўлсам, «Реал» ҳозир яхши ўйин намойиш этяпти ва Жозе Моуриньо «Барселона»га бирорта «сюрприз» тайёрлаб қўйган бўлиши ҳам эҳтимолдан холи эмас. Балки каталонияликларнинг тактикасини ўзига қарши қўллаб, ҳимоявий ўйин намойиш этар. Голларни эса менимча, мадридликлардан Роналду, Бензема ёки Ди Мария, каталонияликлардан эса Месси, Хави ёки Иньесталар уришлари мумкин.
Марат Бикмаев («Алания» ҳужумчиси):
1. «Барселона»га мухлислик қиламан. Учрашув қийин кечса-да, менимча «Барселона» кичик - 3:2 ёки 2:1 ҳисобларида устун келиши мумкин.
2. Биринчидан, «Барселона» футболчилари бир-бирларини яхши тушунишади. Иккинчидан, каталонияликлар таркибидан кучли футболчилар ўрин олишган. Уларда маҳорат ва иштиёқ кучли. Шу омилларни ҳисобга олган ҳолда, Хосеп Гвардиола шогирдларининг ғалаба қозонишларини башорат қиляпман. Аммо «Реал» ҳам айни пайтда юксалиш палласида ва буни ҳам унутмаслик лозим.
Дилявер Ваниев («Машъал» сардори):
1. Ҳеч қайси клубга мухлислик қилмайман. Аммо 11 декабрь кунги баҳсда менимча, 2:1 ҳисобида мезбонлар ғалаба қозонишади.
2. Бундай башоратимга эса айни пайтда «Реал»нинг яхши ўйин намойиш этаётгани сабаб бўлди. Тўғри, «Барселона» ҳам кучли клуб. Лекин бу сафар мадридликлар устози Жозе Моуриньо каталонияликларга қарши қандайдир тактика ўйлаб топганлиги эҳтимолдан холи эмас.
Тўғриси, голларни ким уришини башорат қилолмайман.
Санъат Шихов («Пахтакор» ҳужумчиси):
1. Болалигимдан «Реал»га ишқибозлик қиламан. Бу сафарги «Эль-классико»да менимча севимли жа-моам 3:1 ҳисобида ғалаба қозонади.
2. Бундай фикр билдиришимга мадридликларнинг ўйинлари айни пайтда юксалишда эканлиги, «Барселона»нинг ўйинида эса пасайиш бўлаётганлиги сабаб бўляпти. Голларни менимча, «Реал»дан Роналду (иккита), Бензема, каталонияликлардан эса Педролар уришлари мумкин. |
