Farg‘ona viloyatida "Buyuk va muqaddassan, mustaqil Vatan!” shiori ostida mamlakatimiz mustaqilligining 20 yilligiga bag‘ishlangan yoshlar festivali bo‘lib o‘tdi.
"Kamolot” yoshlar ijtimoiy harakati hamda bir qator vazirlik va idoralar hamkorligida tashkil etilgan mazkur festivalda Prezidentimiz Islom Karimov rahnamoligida yosh avlodni sog‘lom va barkamol etib tarbiyalash, ularning zamonaviy bilimlarni egallashlari uchun barcha shart-sharoitlarni yaratish, iqtidorli yoshlarni har tomonlama qo‘llab-quvvatlash borasida keng ko‘lamli ishlar amalga oshirilayotgani haqida so‘z yuritildi. Istiqlol bergan imkoniyatlarning mazmun-mohiyati va ahamiyatini yoshlarga kengroq tushuntirishga alohida e’tibor qaratildi.
Festivalning "Siz sevgan qahramonlar” loyihasi doirasida o‘quv yurtlari, bolalar oromgohlariga tashrif buyurgan poytaxtlik taniqli kino ustalari o‘g‘il-qizlarga fidoyi zamondoshlarimiz obrazini yaratish yo‘lidagi izlanishlari haqida so‘zlab berdilar. "Deputatlar va yoshlar”, "Ommaviy madaniyat va yoshlar ma’naviyati”, "Sharaf daqiqasi” singari ko‘rik-tanlov, davra suhbatlari o‘g‘il-qizlarni o‘qish va ishda, mamlakatimiz siyosiy hayotida yanada faol bo‘lishga undash bilan birga ularning o‘z iste’dod va qobiliyatlarini namoyon etishlariga ko‘maklashadi, turli sohalar bo‘yicha bilim va tajribalarini boyitishga, ogohlik va hushyorliklarini oshirishga xizmat qiladi.
Mahallalar yoshlari, oliy ta’lim muassasalari talabalari ishtirokida Farg‘ona davlat universitetining axborot-resurs markazida bo‘lib o‘tgan "Odam savdosi – umr zavoli” mavzuidagi davra suhbatida Respublika "Istiqbolli avlod” nodavlat notijorat tashkiloti rahbari N.Karimova, viloyat Odam savdosiga qarshi kurashish bo‘yicha idoralararo komissiyasi mas’ul kotibi D.Madxoliqov, mehnat va aholini ijtimoiy muhofaza qilish bosh boshqarmasi boshlig‘i o‘rinbosari M.Dehqonov va boshqalar yurtimizda ushbu transmilliy jinoyatning oldini olish borasida amalga oshirilayotgan ishlar xususida so‘z yuritdilar.
Festivalda "Namunali yosh tadbirkor”, "Sog‘lom turmush tarzi targ‘ibotchisi”, "Ekologiya bilimdoni”, "Namunali kasb-hunar kolleji yetakchisi” kabi o‘nga yaqin nominatsiyalar bo‘yicha ham g‘oliblar aniqlandi.
