Гарри Поттер ҳақидаги киноқисса охирига етиб қолди. Фильмнинг сўнгги серияси касса рекордларини ўрнатмоқда, актёрлар эса бу вақтда келажаги истиқболли лойиҳаларни излашмоқда. Қарийб ўн йил мобайнида Дэниэль Редклифф ва ўртоқлари юлдузлик мақомида бўлишди, аммо уларни келажакда нималар кутаяпти?
Болалигидан юлдузга айланиб, шон-шуҳрат нурида чўмилган актёрлар борган сари студияларни қизиқтирмай қўйишмоқда. Боз устига, ўта машҳур франшизада банд бўлавериш ҳам кино воқеалари якунига яқинлашганида актёрларнинг мавқеида ёмон из қолдиради. "Юлдузли жанглар”нинг бутун жамоасидан фақат Харрисон Фордгина юлдузлигини сақлаб қола олди, бош ролни ижро этган Марк Хэммилл эса ҳозир асосан мультфильмларни овозлаштириш билан банд. Фақат "Узуклар ҳукмдори”даги Вигго Мортенесенгина мавқеини муваффақиятли давом эттириб, омадли кассаларга ва кино мукофотларига эришмоқда. Эҳтимол, биз ёш актёрларнинг келажагига ишонмовчилик назари билан қараётганимиз бекордир, балки келажакда улар ўнлаб йиллар давомида юлдуз бўлиб қолаверишар?
Том Фелтон, 23 ёш
Томни биз август ойида — "Маймунлар сайёрасидаги ғалаён” да кўрамиз. Тўғри, "кўрамиз” деганимиз бироз муболаға бўлиб қолади. Чунки фильмнинг иккита трейлерида Фелтон иштирок этган биттагина кадр бор, холос. Актёрнинг режасида яна бешта лойиҳа бўлиб, улар орасидаги битта ўсмирлар даҳшатли фильмида Томга унчалик асосий бўлмаган роль ажратилган. Қолган лойиҳалар эса Британияда ишлаб чиқариладиган ҳарбий драмалар бўлиб, улар Туманли Альбион сарҳадларидан четга чиқмаса ҳам керак. Яқинда эса актёр образини тубдан ўзгартиришини ва рэп "ўқий” бошлашини маълум қилди. Аммо кейин ҳазиллашганини айтиб, ҳаяжонга тушган матбуотчиларни тинчлантирди.
Дэниел Редклифф, 22 ёш
Дэн ҳозир Бродвейда, "Чиранмасдан омадга эришиш” мюзиклида фаол ишламоқда. Гарчи танқидчилар Рэдклиффнинг ўйинини ўртача деб баҳолашаётган бўлса-да, мюзикл омадли намойиш этилмоқда. Кинода эса Дэниел чандиғи бор сеҳргар ролидан узоқлашишга ҳаракат қилмоқда. У "Қора кийимли аёл” номли даҳшатли фильмда суратга тушмоқда ва Ремаркнинг "Ғарбий фронтда ўзгаришларсиз” номли романи асосида олинадиган фильмда суратга тушишга тайёрланмоқда. Биринчи фильм ўртача бюджетли бўлиб, Европа бозори учун мўлжалланган. Иккинчисига келсак, ҳозирча унинг режиссёри ҳам, чиқиш муддати ҳам белгиланмаган.
Эмма Уотсон, 21 ёш
Йил охиригача актриса "Мэрилин Монро билан етти кун” номли драмадаги иккинчи даражали ролда намоён бўлади. Кейинги йили эса унинг жадвалида иккита лойиҳа пайдо бўладики, улардан бири — "Наполеон ва Бэтси” фильми "Оскар”ни олишни мўлжаллаб турибди. Энг асосийси, актриса яқинда Гильермо дель Торо киришадиган "Соҳибжамол ва маҳлуқ”да иштирок этиш учун шартнома тузган.
Руперт Гринт, 22 ёш
Руп ўзини спорт драмаларига урган — яқин икки йил ичида бирданига иккита шунақанги фильмларда суратга тушмоқчи. Бу фильмларнинг бири британиялик омадсиз чанғичи Эдди Эдвардс ҳақида бўлиб, иккинчисида инглизларнинг "Болтон Вандерерз” жамоаси ҳақида ҳикоя қилинади. Гринт яна "Шаҳар ташқарисида” ўсмирлар триллерида ва "Ўртоқ” ҳарбий драмасида ҳам суратга тушмоқда. Тўртта фильмдан учтаси Голливуддан ташқарида суратга олинади, бундан эса актёр хонаки лойиҳаларни афзал кўриб, Голливудни забт этишга шошилмаётгандек таассурот қолдиради. Эҳтимол, уни бир тўда BAFTA сингари маҳаллий мукофотлар кутиб тургандир ҳам, аммо у блокастерларга кўпроқ мос тушган бўлармиди?
