Бундан бироз вақт олдин Нигерия терма жамоаси ва Лондоннинг "Челси" клуби ярим ҳимоячиси Жон Оби Микелнинг отаси ўғирлаб кетилгани ҳақида хабар берган эдик. Оғир мусибатда қолган футболчи ватандошларига мурожаат қилиб, отасини топишда кўмак беришларини кўради.
"Айтмоқчи бўлган гаплар мана шулардан иборат: мен Нигерияданман ва ҳар доим ватанимга ёрдам бериш учун қўлимдан келган барча ишни амалга ошириб келдим — ватанимиз равнақи йўлида бор кучим билан ўйнадим. Ўйлайманки, энди мамлакатимизнинг менга ёрдам берадиган вақти келди.
Мен отамни ушлаб турганларга ва унинг қаерда эканини ҳақида бирозгина бўлсин маълумотга эга бўлганларга мурожаат қилмоқчиман — мен билан алоқага чиқинг. Отам билан бир неча кундан буён гаплашганимиз йўқ, унинг телефони жавоб бермаяпти.
Отамни ким ўғирлаши мумкинлиги ҳақида ҳеч нарса билмайман. Бундай воқеалар тез-тез мамлакатимизнинг жанубий қисмида учраб турарди, аммо шимолда бундай ҳолатлар кузатилмаган. Менимча отам шимолда ҳам бошланиб кетган мана шундай жиноятнинг домига тушиб қолган кўринади. Мен уйга боришим, онам, ака-укларим ва сингилларим билан суҳбатлашиб олишим керак. Бироқ ҳозирча кутиб турмоқчиман, балки яқин йигирма тўрт соат ичида бирорта маълумот чиқиб қолар. Шунда нима қилиш кераклигини аниқ билиб оламиз.
Отамни ушлаб турганлардан ўтиниб сўрайман — илтимос, уни қўйиб юборинглар. У қари бир инсон ва ҳеч қачон ҳеч кимга ёмонлик қилмаган. Уни нима учун ўғирлаб кетганларини билмайман, бу фожеадан бутун оиламиз, айниқса онам жуда чуқур қайғуда қолган. Умид қиламанки, бир кун ичида вазият ойдинлашиб қолади", - дейди футболчи.