Битта фильм учун бир нечта истеъдодлардан иборат актёрлар ансамблини овора қилишни тушунса бўлади. Камида бир ярим соатлик кадрлар кетма-кетлиги, воқеалар ривожи асосида ижодий гуруҳ ёниши эвазига бунёд бўлажак тафаккур мулки ҳисобланмиш кинокартина миллионлаб одамлар ҳукмига ҳавола этилади. Бир ярим соатлик ақлий меҳнатни атиги 5 дақиқа ичига жамлаш-чи? Бу шунчаки иш эмаслигини яққол бўлади қолади! Устига устак бир фильм яратишчалик югур югурлар битта клип учун сарфланишини қандай изоҳлаш мумкин? Хуллас, Сардор Раҳимхон шундай янгиликка қўл урдики, ўзбек эстрдаси тарихида илк бор дея баҳоланиши мумкин! Бу видеоклиплар оламидаги забт этилган янги поғона, янги ўзгариш. Шунчаки клип эмас, мюзикл! Битта клипда воқеалар, бир неча актёр ва актрисалар иштироки, суратга олиш гуруҳи, воқеа учун жойлар...маблағ ҳам аялмади! Қойил қоларлиси, хонанданинг бундай янгиликка интилиши мухлисларга ва касбга садоқатнинг бир кўриниши, фидойиликдан нишона бўлса, не ажаб? Энди янгиликка батафсилроқ қайтсак..
Раҳимхоннинг Мустақиллигимизнинг 20 йиллигига бағишланган навбатдаги туҳфаси "Нима учун" клипидир! Паркентнинг Сўқоқ қишлоғи бир кунда ҳали бу қадар кўп кино юлдузларини кўрган эмас. Ушбу янги лойиҳа суратга олиш жараёнининг ўзи қишлоқ аҳлига завқ улашди. Мурод Ражабовнинг трактор бошқаришию, дарахтга бойланган Раҳимхонга Алишер Файзнинг клиплари орқали жуда танилиб кетган, мафтункор раққоса Паризоданинг оддий қишлоқ келинига айланиб, бир коса сув тутиши...Бу ҳам майли, Тўти Юсупова, Муқаддас Холиқов, Алишер Узоқов, Ботир Муҳаммадхўжаев, Шерзод Бин, "Баён"чи Ойбек, "Томоша" гуруҳидагилар мюзикл сонияларини қандай кадрлар билан бойитишини билиш истагида премерани интизорлик билан кутишдан ўзга чорамиз йўқ! Иқбол Муҳаммаджонов мусиқаси, Охунжон Ҳакимов сўзи билан куйланган ушбу таронага клипмейкер Наримон Султонхўжаев режиссёрлигида олинган мюзикл байрамга муносиб туҳфа бўлишига ғоя муаллифи ва бош рол ижрочиси Раҳимхон ишонтирмоқда.
Сўнгсўз ўрнида...
Машҳурларнинг санъатсевар қишлоқ одамлари кўз ўнгида бажарган роллари, ҳазил-мутойибага тўла воқеалари ҳамманинг оғзига тушгани рост. Бу кетишда мюзикл ТВга чиқишидан олдин бутун республикамиз бўйлаб халқимиз орасида кўрилгани каби ҳайратлар улашишига эришилади-ёв!
