|
"ОЗОД-ШОУ”НИНГ ФАЙЗИ БЎЛАКЧА
Юртимиз истеъдодли санъаткорларга бой. Аммо ўзининг ҳангомалари билан одамларга табассум ҳадя этувчи қизиқчиларимиз бармоқ билан санарли. Ана ўшалар ўртасида "Аббос Бакиров” номли театрнинг олий тоифали актёри, клипмейкер, қизиқчи, кинорежиссёр ва каскадёрлик қобилиятларини ўзида жамлаган Ғайрат Аҳмедовнинг ўзига хос ўрни бор.
- Сизни 20 кун қидириб, аранг топдик. Бу журналистларни хушламаслигингиздан далолатми?
- Йўғ-э, шунчаки ижодий ишларимиз кўпайиб кетди, холос. Бир қатор тадбирларда иштирок этиш лозим эди. Кейин хабарингиз бўлса керак, мен Озодбек Назарбековнинг "Озод-шоу” мусиқий дастури устида ишлайман. Кейин, яна бир қатор санаъткорларимиз яратган қўшиқларга клип суратга оляпман. Илгарилари ҳам Озодбекнинг, Гули Асалхўжаева, Лола Аҳмедова, Равшан Комилов, Анвар Санаев, Отабек Муҳаммадзоҳид, Сардор Раҳимхон каби саънаткорларнинг қўшиқларига ўзим сценарий ёзиб, ўзим клип олганман.
Бундан ташқари, ҳар йили бўлиб ўтадиган анъанавий "Сен барибир муқаддассан аёл” концерт дастурида ҳиндистонлик инспектор Виджай образида намоён бўлдим. Шу боис, бўш вақтим озроқ. Тўғри тушунарсиз...
- "Озод-шоу” дастурига рақобатчилар пайдо бўляпти...
- Мен ҳам бу тўғрида эшитдим, аммо ҳозирча бирор нарса дея олмайман. Биласизми, ўзи "Озод-шоу” бошланганидан ке йин бунақанги дастурлар кўпайди. Лекин Озодбек дастурининг файзи ўзгача. Негаки, у турли соҳа ижодкорларининг юксалишига хизмат қилмоқда. Бу дастур Озодбекнинг рейтингини ошириш учун яратилмаган.
- Кўпинча клипларда мураккаб трюкларни бажарасиз. Бу сизга оғирлик қилмайдими?
- Мени бошқалардан ажралиб турадиган томонларим ҳам шунда, деб ўйлайман. Билсангиз керак, футболда ҳам чиройли йиқилишни ўргатишади. Биз санъаткорларда, бу вазифани каскадёрлар бажаришади. Аммо мен ўзим иштирок этадиган клиплардаги мураккаб вазифаларни ўзим бажараман. Баъзилар бу компьютер техникасининг иши, деб ўйлашади. Йўқ! Ундай эмас. Компьютер фақат кадрларни тезлаштириб ёки секинлаштириб беради, холос.
- Кейинги вақтларда қизиқчилик санъатидан бир оз чекингандек кўриняпсиз. Кулгили воқеаларга бой репертуарли DVD дискларингиз чиқмай қолди.
- Тўғри, менинг дискларда тарқалган, кулгили чиқишларга бой дастурларим бўларди. Улар фақат водий халқига мўлжаллангандек кўриниш бериб келаётган бўлиб, одатда маҳаллий телеканалларда кўрсатиларди. Энди эса, мен бундай чиқишларимни марказий телеканаллар билан ҳамкорликда ташкил қилмоқчиман. Насиб қилса, яқинда "Дунё ҳангомалари” деб номланган янги дастуримиз эфир юзини кўради.
Ҳозир кундан-кунга одамларни кулдириб, кўнглини олиш осон бўлмаяпти. Гоҳида телеэкран қаршисида кўп намоён бўладиганларни халқ барибир суйиб қарши олаверяпти, у бугун қандай чиқиш қилишини аҳамияти йўқдек. Халққа сенинг кимлигинг эмас, балки нима бера олишинг қизиқ туюлиши керак.
- Ғайратбек, сизни футболнинг асл мухлисларидан бири деб биламиз. Ям-яшил футбол майдонларида ажойиб, бир-биридан кулгили воқеалар асосида нимадир яратиш тўғрисида ўйлаб кўрмаганмисиз?
- Кўнглимдагини топдингиз. Бу албатта режаларимизда бор. Футбол билан санъатнинг уйғунлигини намойиш этамиз, шундай қилишимиз шарт, деб ўйлайман. Халқимиз футболни ҳам, санъатни ҳам бирдек севади. Кимгадир қувонч улашсак, бу биз учун шараф.
|
