Бугун, яъни сешанба куни Лондон Олимпиадасининг ҳал қилувчи босқичи биринчи туридаги Ўзбекистон Ироқ учрашуви олдидан Жар стадиони анжуманлар залида ҳар икки жамоа вакиллари иштирокида матбуот анжумани ўтказилди. Дастлаб меҳмонлар устози Ради Суади саволларга жавоб қайтарди.
Ради Суади (Ироқ олимпия терма жамоаси мураббийи): - Биз Ўзбекистонга биринчи марта ташриф буюрдик, лекин мен Қатар СК таркибида Пахтакорга қарши учрашувда иштирок этганман. Мамлакатингиз ҳақида тасаввурга эгаман. Эртанги баҳс иккала жамоа учун қийин ўтади. Чунки илк учрашувлар ҳамиша қийин кечади. Бизда рақиб тўғрисида баъзи малумотлар бор, аммо унчалик кўп эмас. Шу сабабли эртага мураббийлар фикрларининг тўқнашуви асосий планга чиқади деб ўйлайман. Ҳозир эса барча тўрт жамоада тенг имконият мавжуд.
- Сиёсий можароларга қарамасдан араб жамоалари футбол ўйнашдан тўхташмаяпти. Сурия Саудия Арабистонида ўйинини ўтказади. Ироқ ўз ўйинларини анча вақт сафарда ўтказган. Бунга қандай муносабат билдирасиз?
- Сурияда можаролар юз бергани учун ушбу жамоа энди уй беллашувларини бошқа мамлакатда ўтказишга мажбур бўлмоқда. Биз эса деярли 20 йил мобайнида ён мамлакатларда ўйинларда майдонга тушган. Лекин ҳозир Ироқда вазият анча барқарорлашган. Беш йилдан буён мамлакат чемпионати мунтазам равишда ўтказилиб келиняпти. Яқинда лига кубоги финалига Бағдоддаги стадионга 50 минг ишқибоз ташриф буюрди. Ўйинларни асосан Арбилда ўтказамиз. Лекин бу бошқа шаҳарларнинг нотинч эканлигидан хабар бермайди. Шунчаки, Арбилдаги шароитлар жуда яхши. У ерда ташкилотчилик бўйича ҳеч қандай муаммолар йўқ.
- Зиконинг Ироққа ташриф буюриши мамлакат футболи учун қанчалик фойдали ва олимпия термаси учун?
- Менимча, бу Ироқ футболи ривожланишига катта ёрдам беради. Чунки Зиконинг тажрибаси етарли. У эндигина ташриф буюрди ва ҳали кўп иш қилишга улгурмади. Лекин олдинда Зикода вақт бор. Бу вақт ичида у Ироқ футболининг тараққий этишига ҳиссасини қўшади. Унинг футболимизга янгиликлар олиб киришига шубҳам йўқ. Зико барча терма жамоаларни кузатиб бориб, миллий термага янгиликлар олиб киришга ҳаракат қилади.
- Жамоанинг мазкур баҳсга тайёргарлиги қандай кечди? Таркибда йўқотишлар борми?
- Бизда жароҳатлар билан боғлиқ йўқотишлар юзага келмади. Лекин бундай бўлган тақдирда ҳам уларнинг ўрнини тўлдиришга етарли номзодлар бор. Жамоамизда футболчилар аввалги босқичга қараганда деярли ўзгармаган. Тайёргарликни эса яхши олиб бордик. Қатар терма жамоаси билан ўртоқлик учрашувини ўтказдик. Қатарни Дохада 2:1 ҳисобда мағлубиятга учратдик. Бир ҳафта у ерда машғулотлар ўтказдик. Тошкентга айнан Дохадан етиб келдик.
- Зико ўзбек футболи ҳақида қанчалик маълумот берди?
- У юртимизга ўзбек футболи ҳақида ахборот бериш учун эмас, балки умумий футбол ривожланишига ёрдам бериш учун ташриф буюрган. Чунки бундай мураббийлар олдига шундай вазифа қўйилади. Зико ироқлик футболчиларнинг ўсишига ёрдам беради. Ўзбекистонда ҳам у жамоасидаги фаолияти орқали шунга ҳаракат қилди. Зиконинг ташрифи, аввало, футбол ассоциацияси учун.
- Гуруҳимиз тўғрисида қандай фикр билдирасиз?
- Гуруҳда тенг кучли жамоалар жамланган. Ироқ ва БАА араб футбол услубида ҳаракат қилса, Австралия ҳамда Ўзбекистон европача услубга яқин ҳолда тўп тепади. Бундай ҳолатларда меҳмонга ташриф буюриб, ўша жамоага хос тарзда ўйин намойиш қилишга интилишингиз ҳам мумкин. Маҳаллий иқлим ҳам баъзан ўйин услубини ўзгартиришга олиб келади. Бизда йўлланмани қўлга киритиш учун имконият бор деб ўйлайман.
***
Меҳмонлар мураббийидан сўнг олимпия терма жамоамиз устози Вадим Абрамов ва ҳужумчи Темурхўжа Абдухолиқов ОАВ билан мулоқотда бўлди.
Вадим Абрамов (Ўзбекистон олимпия терма жамоаси бош мураббийи): - Ҳал қилувчи учрашувлар старт олмоқда. Масъулиятни барча яхши ҳис қилиб турибди. Айниқса, биринчи ўйинни уйда ўтказиш руҳий жиҳатдан қийин. Чунки рақибни мағлубиятга учратиш шарти босим юклайди. Ироқнинг ўйинларини ўрганиб чиқдик. Биринчи беллашувда зафар қучиш бизга кейинги беллашувларда ёрдам беради.
- Таркибда йўқотишлар борми?
- Олег Зотеев ва Дилшод Раҳматуллаевнинг майдонга тушиши аниқ эмас. Умид қиламанки, улар эртага тайёр ҳолатда бўлишади.
- Ироқ ҳақида қандай фикрдасиз?
- Улар ўз майдонида Эронга имкониятни бой бериб, сафарда 2:0 ҳисобида мағлубиятга учратишган. Демак, бу жамоа ҳурмат қилишга арзийди. Шундай экан, Ироққа қарши жиддий ўйин ўтказамиз.
- Гуруҳда кимни фаворит деб ҳисоблайсиз?
- Барча тенг имкониятга эга. Лекин БАА бу ёш тоифасида Осиё чемпиони ҳисобланади. Лекин яқиндагина уларни мағлуб этган Уммон билан баҳслашдик ва ғалаба қозондик. Бошқа тарафдан расмий учрашувлар барибир бошқача тарзда ўтади. Ироқ эса Эрондан устун келган. Австралия жуда жарангдор номга эга, лекин уларнинг ўйини ҳақида бирор нарса дейишим қийин.
- Кейинги тайёргарлик қандай олиб борилади? Футболчиларни терма жамоага жалб қилишда қийинчилик юзага келмайдими?
- Аввало, Ироқни мағлубиятга учратиш лозим. Шундан кейин клублар билан бир-биримизни тушунган ҳолда иш олиб борамиз. Олдимизда бир халқаро турнирда иштирок этиш ва яна бир ўртоқлик баҳсини Тошкентда ўтказиш варианти турибди.
- Турнир ҳақида батафсил маълумот бериб ўтсангиз.
- Вьетнамдаги мусобақада мезбонлар, Индонезия ва Малайзия терма жамоалари қатнашишади. Ушбу жамоаларни кучсиз деб ўйламайман. Чунки қайсидир журналист Европанинг Муғулистони деб таърифлаган Албания ҳозир Европа чемпионатига чиқишга даъвогарлик қилмоқда. Барча нарса майдонда ҳал этилади. Кимнингдир қанчадир вазн ёки бўйга эгалиги аҳамиятга эга эмас.
- Аввалги босқичда тажрибангиз борлиги сизга ёрдам берадими?
- Шундай бўлишига умид қиламан. Ҳар ҳолда, аввалги саралаш раундида иштирок этганман. Ўшанда Жанубий Кореяда биз аламли мағлубиятни қабул қилганмиз. Бизга қизил карточка қимматга тушганди. Ўшанда йигитларга корейсларни ютолмасдан хато қилганимизни айтгандим. Энди эса ўшандай хатоларга йўл қўймасликка интиламиз. Лекин учрашув давомида турли ҳолатлар таъсирида ўйин ўзгариб кетиши мумкин. Мисол учун, икки кун аввал Реал Левантени ютиши керак бўлган беллашувда айнан қизил карточка туфайли мағлубиятга учради.
- Ушбу олимпия терма жамоасида яққол етакчининг йўқлиги муаммо эмасми?
- Йўқ, аксинча бу ушбу авлод термасини янада кучлироқ кўрсатиб турибди. Чунки бутун жамоа ўйин ташкил қилишда қатнашмоқда. Шу кетишда яқин вақт ичида бир неча ўйинчи миллий терма жамоага кўчиб ўтиши мумкин.
- Араб жамоаларининг вақтни чўзишига қарши чора борми?
- Биз бугунги йиғилишда раҳбариятимизга рақиб жамоа вакилларига майдонда ҳакамнинг қарори билан иш кўришимизни айтишни тайинладим. Чунки араблар вақтни чўзиш учун майдонга ётиб олишади. Биз эса бундай ҳолатларда ўйинни давом эттирамиз, токи ҳакам ўйинни тўхтатмагунча. Чунки майдонда мухлислар ҳалол футбол кўришлари шарт. Биз шунга амал қиламиз.
Темурхўжа Абдухолиқов (Ўзбекистон олимпия терма жамоаси ҳужумчиси): -Ироқнинг Эрон билан ўтказган баҳсини томоша қилдик. Уларга қарши бемалол ўйнаса бўлади. Эртага мухлисларни ғалаба билан хурсанд қилишга интиламиз.
- Техникангиз яхшилигини инобатга олсак, эртага араб футболчилари билан беллашувда сизга осон бўлади деб ўйлайсизми?
- Йўқ, бундай бўлмаса керак. Чунки барча учрашув мобайнида бор имконияти билан ўйнайди. Шу сабабли мен ўз ўйиним билан уларни хато қилишга мажбур этишга интиламан. Энг муҳими эса жамоанинг ғалаба қозонишидир.
