Атоқли шоир Расул Ҳамзатов шеъриятга таъриф беролмаслигини таъкидлаб, "шеърият ҳақида барча айтганларим денгизга жўмракда сув қуйгандай бетаъсир” деганди. Биз қуйида шеърият денгизининг бир томчиси ўзбек халқининг мингга яқин севимли қўшиқлари муаллифи Аҳад Қаюм ижоди ҳақида фикр юритар эканмиз, бу камтарона фикрларимизни самимийлик ўрнида қабул қилгайсизлар.
"Ҳаёт темирйўлмас изидан юрсам...” дея баланд овозларда ижодини бошлаган шоир тез фурсатда китобхонларнинг севимли шоирига айланди. Айни дамларда шеърият мухлислари қўлидан қўймай ўқийдиган китоблар уники.
Унинг шеърларидаги ҳаётдан, ўз ҳаётидан қилган хулосалари ўқувчини ҳам чуқур ўйга толдиради.
"...Нолаларим вақт чархидан ўтармикан?!”
"...Нишон топмаган ёй камондан нолир...”
"Асал тутган тишларида ниш кўрдим.”
Юқоридаги мисралар битган қалбда жудаям узоқ-узоқларда акс-садо берадиган назмий садолар янграйди.
Шоир бугуннинг суратини чизиб эртага олиб ўтувчи шахс. Аҳад Қаюмнинг ёзганларида ижтимоий ва маиший ҳаётимиз жилолари бироз тўпори, бироз ўйноқи шаклларда юз кўрсатади.
Аҳад Қаюм шериятнинг нозик унсурларидан бири қарама-қаршиликни баъзида бир сатрга "Севишимни кутганлар ҳам бор, совишимни соғинди кимлар?!” деб уддабуронлик билан жойлаштирса,
"...Севги...
Тўғри йўлни нега билмайсан?
Севгилимга учратиб қўйиб,
Нега бизни бахтли қилмайсан?”
Деб маънони тарқоқроқ беради.
Яна кенгроқ масштабда:
"Онасизга она бўл, ҳаёт!” деб ёзади.
Аҳад Қаюмнинг мустақиллигимизнинг йигирма йиллиги арафасида чоп этилган "Кимлар” шеърий тўплами китобхонларга тақдим этилган энг яхши туҳфа бўлди. Унинг шеърларида Ватан садоқати ўз дилидан чиққан содда ва самимий фикрлари алоҳида аҳамиятга эга. У ўз туғилиб ўсган ота юрти ҳақида шундай деб шеърий мисра тузади.
"Бухоро деб ўлсанг арзийди!”
Ёки
"Ватан ишонган билак бўлайлик...”
Тарихий ҳақиқатларни жамлаш истеъдоди:
"Алпомишнинг белбоғи қани?
Барчинойнинг рўмоли қани?”
Унинг ижодида юқоридаги каби жасоратли сатрларни кўплаб топиш мумкин.
Шоирни минг мақтамайлик, у ҳам барча чин санъаткорларга хос камтарлик билан шундай деб бош эгади.
"Кечир, гоҳо хаяжонли пайтларим,
Билиб-билмай ёзган хато байтларим.” Деб Аллоҳга нола қилади.
ЎЗБЕКТОШ ҚИЛИЧБЕК
2011 йил
КЕЧИККАН СЕВГИ
"КЕЧИККАН СЕВГИ???”
Бу ном сизни ҳам ўйлантириб қўйдими?
Унда, шошилинг.
"Ўйин ичида ўйин” бадиий фильмининг сценарий муаллифи Ўзбектош Қиличбекнинг янги китоби шундай деб номланади.
"Шарқ” нашриётида чоп этилган ушбу ҳикоялар тўпламида бир-биридан қизиқ, бир-биридан таъсирли севгига ва эҳтиросга тўла сатрларни топасиз.