|
Ғуломжон Ёқубов:«Концертларда Озодбек Назарбековдан ёш кўринаман!»
Халқимизда "Мевали дарахтга тош отилади”, деган мақол бежизга айтмаган. Мухлислар санъаткорни ардоқлаб, ютуғини олқишлаб, камчиликларини танқид қилгани унинг диққат-эътибордалигини англатади. Шундай экан, саҳифамизнинг бу галги қаҳрамони, Ўзбекистон халқ артисти Ғуломжон Ёқубов бўлиб, суҳбатимиз мавзуси устоз санъаткоримизнинг айрим мухлисларнинг эътирозларига сабаб бўлган охирги ижод намуналари ҳақида кечди...
— Ғуломжон ака, бугунги кунда ўз ижодингиздан ортиб шогирдларингизга кўпроқ эътибор қаратаётганга ўхшайсиз...
— Тўғрику-я, лекин мен ўзимнинг ҳам ижодимга кўпроқ эътибор беряпман. Ҳеч кимдан кам жойим йўқ, кам бўлмайман ҳам. Мен ижод одамиман. Ҳали ижоддан тўхтаганим йўқ. Шу қаторда бошқаларнинг ижодига ҳам эътибор бериб қарайман.
— Шогирдларингизнинг саҳнада, экранда ўзини тутиши борган сари сизга ўхшаб кетаяпти...
— Мен тақлидга қаршиман. Устоз-шогирд анъаларига риоя этган ҳолда ижод қилгандан кейин фақат тақлид қилиш шарт эмас. Санъатга қадам қўяётган инсон аввало ўзининг қайси йўналишда ижод қилмоқчилиги ҳақида ўйлаб олиши керак. Шогирдларга келсак, улар ўз йўлини топиб олгунча менга ўхшашга ҳаракат қилишаётгани эҳтимолдир. Аммо бу нотўғри эканлигини кўпчиликка айтаман. Баъзилар ҳақиқатан юриш-туриши, кийиниши, саҳнада гапиришларимизгача ўхшатмоқчи бўлишади.
— Санъаткорнинг саҳна ва саҳна ортидаги кийиниш услуби қандай бўлиши керак деган фикрдасиз?
— Санъаткор ҳамма жойда ўрнак бўлиши керак. Шунинг учун ҳам бошқалардан сал фарқлироқ бўлиб, ажралиб туриши керак деб ўйлайман.
— Қанийди, ҳамма санъаткорлар сиз айтгандек ўрнак бўла олса! Айримлар миллий қўшиқларни куйлай туриб, мухлислар қаршисида европа либосларида намоён бўлишади...
— Тўғри. Лекин телевидениега тўн, дўппи билан чиқмайди-ку, барибир? Агар ўша европача либосини моделлаштириб, миллий кўринишда кийиб чиқишса яхши бўлади. Лекин бу нарса йўқ-ку! Қизларда бор, миллий матолардан аралаштириб тиктиришяпти. Европа либосларига қарши эмасман, ярашса кийишсин. Кийим барибир одамни очадиган нарса. Қанийди, эркакларга ҳам моделлаштириб, ўзбекча миллий кўринишда либослар тикиб беришса...
— Энди бу санъаткорларнинг талабига ҳам боғлиқ-да! Дизайнер санъаткорнинг буюртмаси асосида либос яратади-ку?
— Тўғри. Лекин ҳар бир санъаткор қўшиқларининг руҳига қараб либос тиктиради.
— Масалан, сизнинг охирги "Санамгина” қўшиғингизни менга жуда маъқул бўлди. Қўшиқ мусиқаси, клипига гап бўлиши мумкин эмас. Лекин шу қўшиқ клипида сизнинг Европа спорт услубидаги жинси костюм-шимда кўринганингиз кўпчилик мухлисларнинг эътирозига сабаб бўлди...
— Одамлар мени фақат костюм-шимда кўриши керак эмас-да! Мен кўча-кўйда юрганимда ҳам спорт, европача услубдаги жинси костюм-шимларда юраман.
— Шу услубда кийиниб чиқишингизни режиссёр таклиф қилдими?
— Режиссёр ўша клипдаги қизнинг замонавий эканлигини, у замонавий либосларда худди учиб юргандек суратга тушишини айтди. Ахир мен жиддий костюм-шимда чиқсам қанақа бўларди? Унга мос кийиниш керакми?
— Тўғрику-я, лекин клипда қаҳрамон сифатида ёш қиз билан суратга тушганингиз ҳақида ҳам кўпчилик танқидий фикр билдиришяпти...
— Мен клипга тушадиган ёш йигитлар билан теппа-тенг кўринаман! Ўзим биламан бу нарсани, нега бошқа одамни клипимга олишим керак? Концертларда ҳеч аҳамият бермайсизларми, ўша ёшлар билан бирга ўтирганимда, улардан фарқим борми, йўқми? Айтайлик, сизлар яхши кўрадиган Озодбек ёнимда турса, мендан ёш кўринадими? (кулиб) Сиз бир эътибор бериб кўринг-да концертларни, кейин гапиринг!
— Ғуломжон ака, кўнглингизга олманг. Сизнинг санъатингиз ҳам, ижодга кириб келган вақтингиз ҳам баъзи бировларникидан улуғроқ. Шунинг учун ҳам мухлислар ижодингиздаги бу ўзгаришларни ҳазм қилишолмаётгандир?!
— Ҳазм қилишолмаётганлар тушунчаси паст одамлар бўлади. "Қайси биридан қарироқ кўриняпти Ғуломжон ака?”, деб сўранг-чи, концертда бир солиштириб кўришсин.
— Ўзингизга оддий мухлис сифатида баҳо беринг...
— Ўзимга кўпинча танқид назари билан қарайман. Имкони борича бошқалардан бурнимни кўтармасликка ҳаракат қиламан. Камтарликни ўзимда бир касб деб биламан. Ёшу қари билан бир хил муомалада бўлишга ҳаракат қиламан.
— Бошқа санъаткорлар ҳам сиз каби бўлишганида эди...
— Улар юлдузлик касалига чалинган. Уларни телевизорда ёки газетада, "фалончи юлдуз” деб бир мақтаб қўйинг, «Бўлди, энди машҳур бўлдим, шу йўлда кетаман», деб бошқаларни оёғининг учи билан кўрсатиб қолади. Лекин мен ёшлигимда ҳам унақа бўлмаганман. Улардан минг марта баланд бўлган тақдиримда ҳам манмансирамаганман. Чунки бизда тарбия кучли бўлган. Бизнинг устозларимизда ҳам шунақа нарса бор эди. Улар ҳеч қачон кибрланмаган. Ҳозир айрим санъаткорлар. манманликни ҳам бир-биридан ўтказиб юборишяпти. Бу ҳолатни юлдузлик касалидан деб биламан. Балки жойига тушиб қолар, лекин кеч бўлади-да! Ўн йиллик ижод жараёнидаги санъаткорларни олиб кўрайлик, шунақаларнинг нечтаси келиб, нечтаси кетди, тўғрими? Қани, улар? Журналистларда энг ёмон одат бор: санъати борми-йўқлигидан қатъи назар, "порлаётган ёрқин юлдуз, бунақаси бўлмайди” деб кўкларга кўтаришади. Ҳаёт шунақа, бугун бор эртага йўқ. Бугун бири келиб-кетса, эртага бошқаси келади. Буни ўша димоғи осмонга кўтарилганлар ўйламайди ҳам.
— Мана шундай тушунчаларни шогирдларига ҳам ўргатмайдими?
— Ие, устозларининг ўзи шунақа бўлса-чи? «Устоз кўрмаган шогирд ҳар мақомга йўрғалар», деган гап бор. Устознинг ўзи яхши устоз қўлида тарбия топган бўлиши керак. Кейин яхши устозга шогирд тушиш керак. Ким билсин... (ўйланиб) балки ҳаммаси ўз изига тушиб кетар?
— Аёлларни, қизларни яхши кўрасиз, деб эшитганмиз...
— Албатта, аёллар, онажонларимиз азалдан биз санъаткорларнинг илҳом паримиз бўлиб келишган. Яширмайман, мен ўзим аёлларни, қизларни яхши кўраман. Тўғрисини айтаман. Ҳаётни яхши кўраман. Шунинг учун менинг репертуаримда муҳаббат тўғрисидаги қўшиқ кўп. Ижодкор ҳаётдаги ҳамма гўзалликдан илҳом олишни билиши керак. Шу яшаётган жойимизнинг азизлиги, гўзаллиги, тинчлигидан илҳом олишимиз керак.
— Бугун устоз санъаткор сифатида ортингизга боқиб, нималарни кўрасиз?
— Ортда жуда ҳам катта ижодни, санъатни кўраман. Ўзбек халқига устоз санъаткорлардан қолдирилган улкан меросни кўраман. Энди шуни шогирдларимиз чиройли давом эттиришларини хоҳлайман. Ҳозирги қўшиқчиларнинг ичида ҳам яхши, маъноли қўшиқларга чиройли сайқал бериб айтаётган санъаткорлар кўп. Орамизда шундай ижодкорлар кўпайишини хоҳлайман.
|
